नेपालबाट आयातभन्दा दोब्बर बढी विद्युत भारतमा निर्यात

नेपाल पहिलोपटक आयातभन्दा दोब्बर बढी परिमाणमा भारतलाई विद्युत निर्यात गरेको छ।

नेपाल विद्युत प्राधिकरणको पछिल्लो तथ्यांकअनुसार भारतबाट २३ मेगावाट मात्रै विदयुत आयात हुँदा निर्यात भने ५६ मेगावाट भएको छ। आयातित ऊर्जा ५ लाख २७ हजार युनिट छ भने निर्यात करिब ५ लाख युनिट रहेको छ। यसअघि कहिल्यै नेपालबाट भारतमा निर्यात हुने विद्युतको परिमाण आयातभन्दा बढी नभएको भारप्रेषण केन्द्रले जनाएको छ।

पछिल्लो समय माथिल्लो तामाकोशीलगायत निजी क्षेत्रका आयोजनाबाट विद्युत उत्पादन सुरु भएपछि प्राधिकरणले आयात ह्वात्तै घटाएको हो।

पछिल्लो तथ्यांकअनुसार अहिले प्राधिकरणका आयोजनाबाट ४३७ मेगावाट, प्राधिकरणका सहायक कम्पनीबाट ४२२ मेगावाट र निजी क्षेत्रबाट ४८३ मेगावाट विद्युत उत्पादन भएर राष्ट्रिय प्रसारण प्रणालीमा उपलब्ध छ। प्राधिकरणको ८५ लाख ८० हजार युनिट, सहायक कम्पनीबाट ७७ लाख २७ हजार युनिट र निजी क्षेत्रबाट एक करोड १७ लाख ५८ हजार युनिट खपत भइरहेको छ।

पछिल्लो समय भने दैनिक ४ लाखदेखि ५ लाख युनिटसम्म विद्युत भारतमा निर्यात भइरहेको छ। भारतबाट हिउँदमा भने दैनिक पौने २ करोड युनिटसम्म विद्युत आयात भएको रेकर्ड छ। निर्याततर्फ भने धेरैजसो समय दैनिक १ लाख युनिट हाराहारीमात्रै निर्यात हुने गरेको थियो।

यसअघि गत वैशाख १५ गते नेपालले भारतबाट एकैदिन करिब १ करोड ८३ लाख युनिटसम्म विद्युत आयात गरेको थियो। जुन अहिलेसम्मकै उच्च हो। त्यतिबेला प्राधिकरणले विकास गरेका आयोजनाबाट ५८ लाख ३६ हजार युनिट र प्राधिकरणका सहायक कम्पनीसहित निजी क्षेत्रका जलविद्युत आयोजनाहरुबाट कुल ४८ लाख २३ हजार युनिट उत्पादन तथा आपूर्ति भएको थियो।