उपचार क्रममा म्याग्दीमा कैदीको मृत्यु

प्रादेशिक अस्पताल बेनीमा उपचारक्रममा कारागार कार्यालयका एक कैदीको मृत्यु भएको छ ।
मंगला गाउँपालिका, २ बाबियाचौरका अन्दाजी ५० बर्षिय शेरबहादुर विक विहिवार दिउँसो जेल भित्रै अचानक वेहोस भै ढलेपछि कारागार प्रशासनले उपचारकालागी प्रादेशिक अस्पताल बेनीमा पुर्‍याईएकोमा उपचारक्रममा साँझ मृत्यु भएको अस्पतालले जनाएको छ ।
जिल्ला प्रहरी प्रमुख प्रहरी नायव उपरिक्षक सूर्यबहादुर थापाका अनुसार विहिवार दिउँसो २.३० बजे अचानक वेहोस भै ढलेपछि विकलाई उपचारकालागी अस्पताल पुर्‍याएको र थप उपचारकालागी पोखरा रिफर गर्ने तयारी भैरहँदा उनको मृत्यु भएको थियो । विकको शव बेनी अस्पतालको शव गृहमा राखिएको र शुक्रवार परिवारलाई बुझाउने एवं धार्मिक आस्था अनुसार दाहसंस्कार गर्ने तयारी भैरहेको छ ।
जर्वजस्ती करणी कसुरमा १९ बर्ष कैद तोकिएका विक २०७९ फागुनदेखी कारागार कार्यालय बेनीमा कैद भुक्तान गर्दै आएका थिए ।