शिखकिन्दुमा सडक सरर

विश्वभर स्वास्थ्य महामारीको रुपमा फैलिएको कोरना भाईरस (कोभिड–१९) रोकथाम तथा नियन्त्रण गर्न सरकारले लगाएको लकडाउन (बन्दाबन्दी)कै समयमा अन्नपूर्ण गाउँपालिका, ५ शिख–किन्दुवासीले सामुदायीक अग्रसरतामा २ दशमलव ५ किलोमिटर लामो सडक निर्माण गरेका छन ।
गाउँपालिकाको ८ लाख २५ हजार बजेटमा सोही वडाको तल्लो शिखवस्तीबाट ४ लाख, शिखदेउराली वस्तीबाट ५० हजार, पाउद्वार वस्तीबाट १ लाख, किन्दु वस्तीबाट ५० हजार नगद सहयोग र उपभोक्ता समितिबाट १ लाख ४७ हजारबराबरको श्रमदान गरी ४ दशमलव ५ मिटर चौडा २ दशमलव ५ किलोमिटर लामो सडक निर्माण गरेका हुन । सडक खन्न गाउँपालिकाको अनुदान, चन्दा तथा श्रमदानसमेत १५ लाख ७१ हजार ८ सय ७० रुपैयाँ खर्च भएको सडक निर्माण समितिले जनाएको छ ।
‘गाउँमै उपलब्ध डोजर तथा श्रमिक प्रयोग गरी सडक निर्माण गरेका छौं । कुनाको वस्ती किन्दुमा पनि अव सडक पुगेको छ’ किन्दुका स्थानीय ज्ञान शेरपुजाले भने, ‘राज्यले थोरै बजेट दिँदा समुदायले धेरै लगानी थपेको छ । सडकले जोडिएपछि किन्दुवस्तीमा उत्पादित आलु समेतको तरकारीले बजार पाउने छ ।’
सडकले जोडिएपछि अन्नपूर्ण गाउँपालिका, ५ किन्दु, गिरवाङ र झारवाङ्गका १ सय ३० घरपरिवारका ५ सय जनसंख्या प्रत्यक्ष लाभान्वीत भएको छ ।

फोटो सौजन्य ः ज्ञान शेरपुजा