प्रमको राष्ट्रका नाममा सम्बोधन: सरकार कोभिड–१९ को उपचारमा पछि हटेको छैन

प्रधानमन्त्री केपी शर्मा ओलीले सरकार कोरोना भाइरस (कोभिड–१९ ) को पहिचान, परीक्षण र उपचार व्यवस्थापनमा पछि नहटेको स्पष्ट पारेका छन् ।

राष्ट्रका नाममा शुक्रबार अपरान्ह सम्बोधन गर्दै प्रधानमन्त्री ओलीले संक्रमितको मृत्यु हुँदा पूर्ववत हुँदै आएको शव व्यवस्थापन कार्य पनि यथावत् कायम रहने बताए ।

सरकारले हुनेले नहुने सबैको स्वास्थ्य सेवामा समान पहुँच बनाउन मात्र त्यस्तो आह्वान गरेको हो भन्दै उनले राष्ट्रिय विपत्तिका बेला अफवाह चलिरहने र तिनको विश्वास नगर्न पनि उनले आग्रह गरे ।

केही दिनअघिमात्र सरकारले स्वास्थ्यकर्मी, सफाइकर्मी, विपन्न, असहाय, अपाङ्गता भएका व्यक्ति लगायतको मात्र निःशुल्क उपचार गर्ने जनाएपछि त्यसको चौतर्फी विरोध भएको थियो । ‘कसैले उपचार गर्न सक्दिनँ भनी स्वघोषणा गरे सरकारले आफैले उपचार गरिदिन्छ,’ उनले सम्बोधनमा भने ।

यसैगरी, उनले दसैं लगायत पर्वको शुभकामना दिँदै भने, ‘विभिन्न ऐतिहासिक पृष्ठभूमि आधारमा चाडपर्व विकास भएका हुन् । सामाजिक सुप्रबन्ध कायम गर्न निर्माण भएका चाडपर्वहरु क्रमशः प्रचलनमा आएका हुन् । पूर्वज र अग्रजहरुले विभिन्न उत्सव र चाडपर्वको विकास गरे । यिनीहरु समाजलाई एकीकृत र आकर्षित गर्ने चुम्बक हुन् । चाडपर्वहरु मितव्ययी र सचेत तरिकाले मनाउनुपर्दछ ।’

कोभिड–१९ को सचेतनाबिनै अनावश्यक रुपमा मानिससँग नजिकिँदा कोरोनाको भय नहोला भन्न सकिन्न भन्दै प्रधानमन्त्री ओलीले यसपालि कोभिड–१९ महामारीको कारण प्रभावमा परेको हुँदा विगतमा भन्दा फरक तरिकाले मनाउनुपर्ने सुझाव पनि दिए ।