सहायक रथी र महासेनानी बर्खास्त

सैनिक आचरणविपरित कार्य गर्ने एक सहायक रथी र महासेनानी सेवाबाट निकालिएका छन्। अनुशासन तथा आचरण सम्बन्धी कसुरमा सहायक रथी सुरेन्द्रसिंह रावल र महासेनानी अनिल खड्कालाई सेवाबाट बर्खास्त गरिएको नेपाली सेनाको मुख्यालयले जानकारी दिएको छ।

बुधबार बसेको समरी जनरल सैनिक अदालतले रावल र खड्कालाई सैनिक ऐन-२०६३ बमोजिम दोषी ठहर गरेको हो।

माथिल्लो कमाण्डरले लिखित रुपमा दिएको आदेश जानीजानी पालना नगरी अवज्ञा सम्बन्धी कसूर गरेको, सैनिक सुव्यवस्था तथा अनुशासन विपरितको काम गरेको र आफ्नो ओहदा अनुसारको जिम्मेवारी र आचरण नगरेको सैनिक अदालतले ठहर गरेको हुँदा दुवैलाई सेवाबाट बर्खास्त गर्ने निर्णय भएको नेपाली सेनाको मुख्यालयले जनाएको छ।