थप ७ जनामा कोरोना संक्रमण, संक्रमितको संख्या १०९ पुग्यो

उदयपुर, कपिलवस्तु र पर्सामा थप सातजनामा कोरोना भाइरसको संक्रमण पुष्टि भएको छ । यससँगै नेपालमा संक्रमितको संख्या एक सय नौ पुगेको छ।

उदयपुर, कपिलवस्तु र पर्सामा आज थप सातजनामा कोरोना संक्रमण देखिएको हो। राष्ट्रिय जनस्वास्थ्य प्रयोगशाला टेकु र कोशी अस्पताल विराटनगरमा गरिएको परीक्षणमा सातजनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ।

स्वास्थ्य तथा जनसंख्या मन्त्रालयका सह-प्रवक्ता डा. समिरकुमार अधिकारीका अनुसार उदयपुरको भुल्केका १८, ४५ र ६५ वर्षका महिलामा संक्रमण पुष्‍टि भएको छ। त्यस्तै कपिलवस्तुका १७, १८ र १८ वर्षकै तीनजना पुरुषमा संक्रमण पुष्‍टि भएको मन्त्रालयले जनाएको छ।

यसैगरी, पर्साको वीरगञ्‍ज महानगरपालिका ३ छपकैयामा थप एकजना ६२ वर्षीय पुरुषमा आज संक्रमण पुष्‍टि भएको छ। कपिलवस्तुमा अस्ति मात्रै दुईजनामा संक्रमण पुष्‍टि भएको थियो। भारतको मुम्बर्इबाट एक साताअघि लुकेर नेपाल प्रवेश गरेका दुईजनामा संक्रमण देखिएको थियो।

आज संक्रमण पुष्‍टि भएकाहरूको स्वास्थ्य अवस्था सामान्य रहेको र उनीहरूलाई अस्पताल लैजाने तयारी भइरहेको छ।

उदयपुरको भुल्के, पर्साको वीरगञ्‍जमा संक्रमितको संख्या धेरै देखिएपछि त्यहाँबाट ठूलो मात्रामा स्वाबको नमूना संकलन भएको थियो। संकलित नमूना परीक्षण गर्दा आज सातजनामा संक्रमण पुष्‍टि भएको हो।