प्रकाश मावि बेनीकी सात दिनकी सुत्केरी शिशु च्यापेर परिक्षामा सहभागी

सदरमुकाम बेनी स्थित प्रकाश माध्यामिक विद्यालयकी कक्षा ११ की सुत्केरी विद्यार्थी सात दिनको शिशु च्यापेर वार्षिक परिक्षामा सहभागी छिन ।

धवलागिरी गाउँपालिका–४ मुदी घर भई प्रकाश माध्यमिक विद्यालयमा कक्षा ११ मा अध्ययनरत सोही विद्यालयमा स्वास्थ्यकर्मी (स्टाफ नर्स)पदमा कार्यरत चन्द्रप्रभा भण्डारीले सात दिनको सुत्केरी  अवस्थामै वार्षिक परिक्षामा सहभागी भएकी हुन ।

सुत्केरी विद्यार्थीलाई छुट्टै परिक्षा हल र स्तनपान कक्षा ब्यवस्था मिलाईएको विद्यालयले जनाएको छ ।

‘कोरोना महामारीको अवस्थाले गर्दा हरेक विद्यार्थीलाई परिक्षा हलमा सामाजिक दुरी कायम गराईएको र सुत्केरी छात्रा तथा नवजात शिशुको स्वास्थ्यलाई थप ख्याल गरी विशेष ब्यवस्था मिलाएका छौं’ प्रकाश माध्यामिक विद्यालयका प्रध्यानअध्यापक हरीकृष्ण सुवेदीले भने, ‘उनी हाम्री छात्रा मात्र होईनन, स्टाफ पनि हुन । सुत्केरी र शिशु दुवैका स्वास्थ्य अवस्था ठिक रहेको छ ।

छात्रा भण्डारी गत वर्ष विद्यालयमा स्वास्थ्यकर्मी पदमा नियुक्त भएसँगै विद्यालयकै कक्षा ११ मा भर्ना भएकी हुन ।

‘घर टाढा भएपनि आफु र शिशुको स्वास्थ्य अवस्था ठिक भएको र परिक्षा हल डेरादेखी नजिकै भएकोले पनि परिक्षामा सहभागी भएकी हुँ ’ परिक्षार्थी भण्डारीले बताईन ।

गते जेठ महिनामै हुनु पर्ने कक्षा ११ को वार्षिक परिक्षा कोरोना कहरको कारण पछि सरेको हो । सरकारले कक्षा ११ र१२ समेत स्थगित सवै परिक्षाहरु भौतिक रुपमै लिने निर्णय गरेसँगै कोरोना संक्रमणबाट वच्न स्वास्थ्य सावधानी सहित मास्क र सामाजिक दुरी कायम गरी धमाधम परिक्षा संञ्चालनमा रहेका छन ।