काठमाडौं उपत्यकाबाट २०७ जना चोर र पाकेटमार पक्राउ

पुनहिल डट कम
३ साल अघि
१७४ पटक पढिएको

चाडपर्व नजिकिँदै गर्दा काठमाडौँ उपत्यकामा चोर र पाकेटमारको विगविगी बढेको छ । यसैलाई नियन्त्रण गर्न भन्दै प्रहरीले अपरेसन नै सञ्चालन गरेको छ ।

यस क्रममा प्रहरीले सफलता पनि हात पारेको छ । प्रहरीले उपत्यकाबाट २०७ चोर र पाकेटमार पक्राउ गरी आज सार्वजनिक गरेको छ । उपत्यकाभित्र चोरी तथा पाकेटमारमा संलग्न दुई सय सातलाई पक्राउ गरी काठमाडौं प्रहरी परिसरले सोमवार सार्वजनिक गरेको हो । झण्डै २० दिनको अपरेसनपछि प्रहरीले उनीहरूलाई पक्राउ गरेको हो ।

महानगरीय प्रहरी परिसर काठमाडौंका अनुसार दसैँलक्षित सुरक्षा कार्यक्रम सञ्चालनका क्रममा उनीहरू पक्राउ परेका हुन् । पक्राउ पर्नेमध्ये एक सय ६१ विरुद्ध अनुसन्धान जारी छ । ४६ जना पुर्पक्षका लागि जेल चलान भइसकेका छन् । कसुर प्रमाणितपछि जिल्ला प्रशासन कार्यालय काठमाडौंको आदेशमा उनीहरू जेल चलान भएको परिसर प्रमुख एसएसपी अशोक सिंहले जानकारी दिए ।

प्रहरीका अनुसार उनीहरू उपत्यकाको चाबहिल, कोटेश्वर, कलंकी, सातदोबाटो, नयाँ बसपार्क, बालाजु क्षेत्रबाट पक्राउ परेका हुन् । पाकेट मार्ने क्रममा उनीहरूले सर्वसाधारण तथा यात्रुले नबुझ्ने भाषा प्रयोग गर्ने प्रहरीको भनाइ छ ।

महानगरीय प्रहरी परिसर प्रमुख सिंहका अनुसार उनीहरुले उपत्यकामा सञ्चालित बस तथा माइक्रोबसका यात्रु र किनमेल गर्न बजारमा गएकाहरुको नगद, मोबाइल र गरगहना चोरी गर्ने गरेका थिए । सार्वजनिक बसभित्र समूह बनाई छिर्ने र पैसा भएको यात्रु पत्ता लगाएर पछाडिबाट घेराबन्दी गरी पाकेट मारेर गरेर पालोपालो गरी ओर्लिने गरेको प्रहरीको भनाइ छ ।

दशैँ विशेष सुरक्षा अन्तर्गत काठमाडौं प्रहरी परिसरले उपत्यकाका नाकाहरुमा समेत कडाइ गरी सुरक्षा निगरानी बढाएको जनाएको छ । दसैँमा काठमाडौं उपत्यका बाहिर घर भएकाहरु जन्मघर जाने र घर तथा कोठा खाली हुने भएका कारण चोरी र डकैती बढ्ने प्रहरीको भनाइ छ । त्यसैले चनाखो रहन र सावधानी अपनाउन प्रहरीले आग्रह गरेको छ ।

तपाइंलाई यो खबर पढेर कस्तो लाग्यो? मन पर्यो

मन पर्योखुशीअचम्मउत्साहितदुखीआक्रोशित