अनिल केसीको मृत्यु रहस्यमै

लकडाउनको ३० औं दिनको साँझ बेनी नगरपालिका, ८ डल्लेपिपलमा मृत फेला परेका एक युवाको मृत्यु रहस्यमै रहेको छ ।

रघुगंगा गापा, २ भगवती घर भै बेनी नगरपालिका, ८ शिक्षामार्ग बस्ने अनिल केसी बुधवार राती १० बजे न्यूवेष्ट पोईन्ट कलेलदेखी तल बेनी–गलेश्वर सडक खण्डबाट तल भेटिएको प्रहरीले जनाएको छ । मृतकको पोष्टमार्टम गरी प्रहरीले विहिवार परिवारलाई शव बुझाएको छ ।

प्रहरीका अनुसार डल्लेपिपल नजिकैको एक घरमा मदिरा सेवन गरेका केसीको मृत्युको कारण खुलेको छैन । अनिल केसीको मृत्यु घट्नामा अनुसन्धानकालागी मदिरा विक्रि गर्ने र सो स्थानमा मदिरा सेवन गर्ने २ महिलासमेत ५ जनालाई अनुसन्धानकालागी हिरासतमा लिएको प्रहरीले जनाएको छ । हिरासतमा लिईएका कसैको पनि पहिचान खुलाईएको छैन ।

‘घट्नाको अनुसन्धान सुरु भएको छ । हालसम्म उनले घट्ना अघि घट्ना स्थल नजिकै एक घरमा मदिरा सेवन गरेको खुलेको छ । २ महिला समेत ५ जनालाई अनुसन्धानकालागी नियन्त्रणमा लिएका छौं’ जिल्ला प्रहरी प्रमुख डिएसपी किरणजंग कुँवरले भने, ‘अनुसन्धानक्रममा रहेकोले यसै भन्न मिल्दैन ।’