कपिलवस्तु जिल्लामा झाडापखाला नियन्त्रण बाहिर, खोपको तयारी

कपिलवस्तु जिल्लामा झाडापखाला पूर्ण रूपमा नियन्त्रणमा आउन नसकेपछि स्वास्थ्य कार्यालय कपिलवस्तुले खोप ल्याउने तयारी गरेको छ।

स्वास्थ्य कार्यालयले खोपका लागि तयारी गरिरहेको जनस्वास्थ्य अधिकृत हेमराज पाण्डेले बताए। उनले साढे २ लाख खोप विश्व स्वास्थ्य सङ्गठनले दिने निर्णय गरिसकेको जानकारी दिए। खोप आउनासाथ कार्यक्रम लागू गरिने पाण्डेले बताए।

पहिलो चरणमा पाँच स्थानीय तहका नागरिकलाई खोप दिने तयारी छ। खोपसँगै नागरिकले पनि सफा पानी पाउने, हात धुने लगायत सरसफाइमा विशेष ध्यान दिएमा मात्र नियन्त्रण हुने स्वास्थ्यकर्मीको भनाइ छ।

अहिलेसम्म जिल्ला स्वास्थ्य कार्यालयको तथ्याङ्कअनुसार शिवराज अस्पताल बहादुरगञ्जमा १ हजार ३३२, वैदौली अस्पतालमा ६१ र शिवराज आधारभूत अस्पतालमा ६ जना उपचारका लागि भर्ना भएका थिए।

अहिले पनि दैनिक १० जनाभन्दा बढी उपचारत रहेको शिवराज अस्पताल बहादुरगञ्जका स्वास्थ्यकर्मीको भनाइ छ। अहिलेसम्म जिल्लामा ६ जनाको झाडा पखालाकै कारण मृत्यु भएको छ। अस्पतालमा भने अहिलेसम्म कसैको ज्यान नगएको स्वास्थ्य कार्यालय कपिलवस्तुले जनाएको छ।

कृष्णनगर नगरपालिका–९ बाट असोजको मध्यदेखि सुरु भएको झाडापखालाको प्रकोप शिवराज नगरपालिका, विजयनगर गाउँपालिका र यशोधरा गाउँपालिकाका बासिन्दामा समेत देखा परेको थियो। अस्पतालमा भर्ना भएका वेला दिसा परीक्षण गर्दा उनीहरूमा हैजा भएको प्रमाणित भएको थियो। 

‘केही दिन कम भएको थियो, पछिल्लो समय फेरि दैनिक ८,१० जना बिरामी आउने गरेका छन्’, शिवराज अस्पतालका डा. मुकेश चौधरीले भने, ‘अझै पनि पूर्ण नियन्त्रणमा आउन सकेको छैन, पहिलाको तुलनामा केही कम भएको छ।’

गाउँमा झाडाबान्ता र पखालाका बिरामी अहिले पनि रहेका छन्। शिवराज नगरपालिका–७, ८ का गाउँमा झाडापखाला देखा परे पनि अहिले नियन्त्रण रहेको नगरपालिकाका स्वास्थ्य शाखा प्रमुख चूडामणि भट्टराईले बताए। *थाहाखवरबाट