कोरियालीले डाँडाखेतमा बनाए विद्यालय भवन

आगोलागीबाट ध्वस्त भएको यहाँ स्थित एक आधारभुत तहको विद्यालय भवन दक्षिण कोरियाको एक संस्थाले निर्माण गरिदिएको छ ।

दुई बर्ष अघि आगोलागीबाट पूर्ण ध्वस्त भएको बेनी नगरपालिका, ४ डाँडाखेत स्थित १–८ कक्षा संञ्चालित वालमन्दीर आधारभुत विद्यायलयको १० कोठे पक्की आरसिसि विद्यालय भवन‘ग्लोवल एजुकेसन फर अल फाउण्डेसन रिपब्लिक अफ साउथ कोरिया’ले निर्माण गरेको हो । भवन बनाउनसंस्थाले ४० लाख खर्च गरेको छ । भवनको फिनिसिङ र रङ्गरोगनको काम बाँकी भएकोले थप रकम आउन बाँकी छ ।

‘संस्थाले १० कोठे विद्यालयको पक्की भवन बनाउँछौं भनेपछि हामीले काम गर्दै गएका छौं, निर्माणको आधारमा संस्थाले ४० लाख रकम पठाएको छ । कति खर्च पठाउने भन्ने सम्झौता भएको छैन’ प्रधानअध्यापक रामप्रसाद शर्माले भने, ‘विद्यालय भवन संरचना बनेपनि अन्य भौतिक पूर्वाधार जुटाउन समस्या भएको छ ।’

विद्यालय भवन निर्माण गर्न विदेशमा रहेका स्थानीयहरुले पनि छुट्टै ३५ लाख सहयोग गरेका छन । बेनी नगरपालिकाले २६ लाख ५८ हजारबढी रकम अनुदान आएको छ । विद्यालयले नयाँ भवन निर्माण गर्न थप जग्गा खरिद गर्न २२ लाख बढी खर्च गरेको र विद्यार्थी अनुपात आँकलन नगरी भवनमा कक्षा कोठा डिजाईन गरिएकोले लागत बढेको विद्यालयले जनाएको छ ।

त्यसैविच म्याग्दी प्रवासी नेपाली संघ (मोना) युके र सयपत्री नेपाली कल्चर ग्रुप युकेले छुट्टै पठाएको एक लाख २५ हजार मोनाका सल्लाहकार शुवास श्रेष्ठले शुक्रवार विद्यालयलाई हस्तान्त्रण गरे

‘नयाँ भवन निर्माण भएपछि उच्च मावि र मावि तहलाई छुट्टाछुट्टै बनाएर अध्यापन गराउन र विद्यार्थीलाई फराकिलो कक्षा कोठामा बसेर पढ्न सजिलो भएको छ’ प्रअ शर्माले भने, ‘भवन त बन्यो सोही अनुरुपको शैक्षिक वातावरण बनाउन चुनौति थपिएको छ ।’