चार दिनदेखिको वर्षाले म्याग्दीमा पहिरोको उच्च जोखिम, दरबाङ र कुहुँमा वर्षाले गर्याे चेतावनीको तह पार

विगत चार दिनदेखि परेको लगातारको वर्षाका कारण म्याग्दीका ग्रामीण पहाडी क्षेत्रहरूमा पहिरोको जोखिम उच्च बनेको छ ।

जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको विपद्पाेटर्लकाे तथ्याङ्क अनुसार पछिल्लो ७२ घण्टा (असोज ६ देखि अाज ९ गते अपराह्न ४ बजेसम्म) मा पश्चिम म्याग्दीको दरबाङमा कुल ८४.६० मिमिटर वर्षा मापन भएको छ ।

यस्तै मङ्गला गाउँपालिकाको कुहुँमा ६१.०० मिमिटर सञ्चित वर्षा पुगेको छ । जल तथा मौसम विज्ञान विभागले पहाडी क्षेत्रमा ६० मिमिटरभन्दा बढी सञ्चित वर्षा हुनुलाई ‘चेतावनीको तह’ मानेको छ, जसलाई दरबाङ र कुहुँ दुवै क्षेत्रले पार गरिसकेका छन् ।

खासगरी पछिल्लो २४ घण्टामा मौसममा आएको परिवर्तन र विशेष गरी आज (असोज ९ गते) दिउँसो १२ बजेपछि वर्षाको गति तीव्र बनेको छ। दिउँसो १ बजेदेखि अपराह्न ४ बजेको अवधिमा दरबाङ, कुहुँ, बेगा र बेनी बजार क्षेत्रमा प्रतिघण्टा ४ देखि ७ मिमिटरका दरले लगातार पानी परेको छ । २४ घण्टाको यो तीव्र वर्षाले सुख्खा वा कमजोर रहेको माटोलाई थप भिज्याएर गलाइदिएकाले अकस्मात् पहिरो खस्ने खतरा बढेको हो ।

विपद् विज्ञहरूका अनुसार पहाडी भूगोलमा एकैपटक ठूलो बाढी आउनुभन्दा पनि धेरै दिनसम्म निरन्तर पानी पर्दा माटोले पानी सोसेर गल्ने हुनाले आकस्मिक बाढीभन्दा भू-क्षय र पहिरोको जोखिम बढी हुन्छ । म्याग्दीका बेगामा ५५.६० मिमिटर र मुनामा ५६.८० मिमिटर वर्षा भइसकेकाले यी क्षेत्रहरू पनि चेतावनीको विन्दु नजिकै पुगेका छन्। सदरमुकाम बेनी बजारमा ४८.६० मिमिटर र तातोपानीमा ३२.०० मिमिटर वर्षा मापन भएको छ।