बंगालको खाडीबाट मौसमी प्रणाली नेपालमा कसरी अाउँछ ?

बंगालको खाडीमा बनेको शक्तिशाली न्यून चापीय प्रणाली (डिप्रेशन) उत्तर आन्ध्र प्रदेश र दक्षिण ओडिशा तट (कलिङ्गापट्टनम नजिक) बाट भारतीय भूभागमा प्रवेश गरिसकेको छ। यो प्रणाली थप उत्तर-पश्चिम दिशातर्फ अघि बढ्दै भारतको छत्तीसगढ, मध्य प्रदेश र उत्तर प्रदेश हुँदै नेपालको दक्षिण-पश्चिम सीमातिर सोझिँदै छ।

बंगालको खाडीमा विकसित शक्तिशाली न्यून चापीय प्रणालीले प्रचुर जलवाष्पयुक्त मनसुनी हावा तानेर नेपालतर्फ धकेल्छ, जुन यहाँको भू-बनोट (पहाड) र पश्चिमी वायुसँग टकराएर सघन बादल बन्दै देशभर भारी वर्षा गराउँछ।

यो प्रणाली नेपालको वायुमण्डलमा प्रवेश गरिसकेको छ । यस प्रणालीलाई पश्चिमी भूभागबाट सक्रिय रहेको पश्चिमी वायुले रोक्दा नेपालको आन्तरिक मौसमी प्रणाली झनै उथलपुथल र सक्रिय बनेको छ ।

जल तथा मौसम विज्ञान विभागका अनुसार यो दोहोरो मौसमी प्रभावका कारण असोज ९ देखि ११ गतेसम्म देशभर भारीदेखि अति भारी वर्षाको जोखिम छ । विशेषगरी गण्डकी, लुम्बिनी, बागमती, कोशी र सुदूरपश्चिम प्रदेशका थोरै स्थानमा अति भारी वर्षा हुने अनुमान छ।