अरिङ्गालको गोलो रेकी गर्न जाँदा भीरबाट खसेर युवकको मृत्यु

अरिङ्गालको सिकारका लागि गोलो रेकी (हेर्न) गर्न गएका म्याग्दीका एक युवकको भीरबाट खसेर ज्यान गएको छ ।

जिल्ला प्रहरी कार्यालय म्याग्दीले दिएको जानकारी अनुसार रघुगंगा गाउँपालिका वडा नं. ७ चिमखोलाका २३ वर्षीय लवकुश पाइजाको भीरबाट खसेर मृत्यु भएको हो ।

असोज ६ गते साँझ करिब ६:३० बजेको समयमा रघुगंगा गाउँपालिका वडा नं. ३ दसमुरेस्थित भीरमा अरिङ्गालको गोलो हेर्न जाने क्रममा पाइजा एक्कासि करिब ३०० मिटर तल खसेर गम्भीर घाइते भएका थिए ।

घटनालगत्तै उद्धार गरी उनलाई उपचारका लागि प्रादेशिक अस्पताल बेनी ल्याइएको थियो। अस्पतालका चिकित्सकले उपचारका क्रममा साँझ ७:४० बजे उनलाई मृत घोषणा गरेको प्रहरीले जनाएको छ। घटनाबारे थप अनुसन्धान भइरहेको छ ।