गण्डकी र लुम्बिनीमा ‘अति भारी’ वर्षाको चेतावनी, उच्च सतर्कता अपनाउन महाशाखाको अपिल

जल तथा मौसम विज्ञान विभाग मौसम पूर्वानुमान महाशाखाले अाज साेमबार साँझ विशेष मौसमी बुलेटिन जारी गर्दै आगामी असोज ९ गते शुक्रबारदेखि असोज ११ गते आइतबारसम्म देशका विभिन्न भागमा भीषण वर्षा र मौसम प्रतिकूल हुने जनाएकाे छ।

बंगालको खाडीको रहेको न्यून चापीय प्रणाली थप शक्तिशाली भई ‘डिप डिप्रेसन’ (बलियो न्यून चापीय क्षेत्र) मा परिणत भएर उत्तर-पश्चिम दिशातर्फ सर्ने क्रममा रहेकाले नेपालमा मनसुनी गतिविधि पुनः सक्रिय हुन लागेको हो। यसको प्रभावका कारण आगामी बुधबारदेखि नै पूर्वी तथा मध्य नेपालमा वर्षाको क्रम बढ्दै जाने महाशाखाले जनाएको छ।

विशेष बुलेटिन अनुसार असोज ९ देखि ११ गतेसम्म गण्डकी र लुम्बिनीका केही स्थानमा मेघगर्जन, चट्याङ्ग र हावाहुरीसहित भारीदेखी धेरै भारी वर्षाको जोखिम सम्भावना रहेको छ। 

यस्तै, कोशी, मधेश, बागमती र सुदूरपश्चिम प्रदेशका थोरै स्थानमा भारीदेखि धेरै भारी र कर्णाली प्रदेशका थोरै स्थानमा भारी वर्षाको आंकलन गरिएको छ। सोही अवधिमा देशका उच्च हिमाली भू-भागहरूमा भारी हिमपात हुन सक्ने भएकाले पर्वतारोही तथा पदयात्रीहरूलाई सतर्क रहन भनिएको छ।