राजनीतिक विश्लेषक भरत दाहाल पक्राउ

सरकार तथा वर्तमान राजनीतिक व्यवस्थाका प्रखर आलोचक एवं त्रिमूल नेपालका अध्यक्ष भरत दाहाल साइबर अपराधको कसुरमा मोरङबाट पक्राउ परेका छन् ।

इलाका प्रहरी कार्यालय बेलबारी र जिल्ला प्रहरी कार्यालय मोरङको टोलीले उनलाई असोज ४ गते (आइतबार) बिहान मोरङको बेलबारीस्थित एक स्थानबाट नियन्त्रणमा लिएको हो । राजनीतिक छलफल तथा एक कार्यक्रममा सहभागी हुन असोज २ गते मोरङ पुगेका दाहाललाई काठमाडौँस्थित नेपाल प्रहरीको साइबर ब्यूरोको अनुरोधमा समातिएको मोरङ प्रहरीले जनाएको छ।

प्रहरीका अनुसार दाहालविरुद्ध काठमाडौँ जिल्ला अदालतबाट पक्राउ पुर्जी जारी भएपछि नियन्त्रणमा लिइएको हो। उनले डिजिटल माध्यम (यूट्युब, फेसबुक लगायत) बाट भ्रामक सामग्री सम्प्रेषण गरेको, सार्वजनिक शिष्टाचार प्रतिकूल अभिव्यक्ति दिएको तथा चरित्रहत्या र द्वेष फैलाएको भन्दै साइबर ब्यूरो (भोटाहिटी) मा किटानी उजुरी परेको थियो।

उनीमाथि विद्युतीय (इलेक्ट्रोनिक) कारोबार ऐन, २०६३ को दफा ४७ बमोजिम कारबाही अघि बढाइएको छ।