असाेज ८ देखी नेपालमा भारी वर्षाको संभावना, पूर्वतयारी गर्न विज्ञको सुझाव

आगामी हप्ता (असाेज ८ गतेदेखी) नेपालमा भारी वर्षाको सम्भावना बढेको छ।

बंगालको खाडीमा विकास भैरहेकाे नयाँ मौसम प्रणाली (चक्रवात/न्यून चापीय प्रणाली) उत्तर तर्फ सर्ने पूर्वानुमान रहेकाेले नेपालमा पनि भारी वर्षाको सम्भावना बढेको छ । तर कुन-कुन स्थानमा बढी असर पर्छ भन्ने कुरा अझै पूर्ण रूपमा पक्का भइसकेको छैन । मौसम पूर्वानुमानका अन्तर्राष्ट्रिय मोडलहरूले फरक-फरक दृश्य देखाएकाले क्षेत्रगत स्पष्टता नभए पनि पूर्वतयारी र उच्च सतर्कता भने अत्यावश्यक रहेकाे माैषमविद्ले बताएका छन ।

विगत ५ वर्षको तथ्याङ्कलाई हेर्दा मनसुन बाहिरिने समय अर्थात् असोज महिनामा भारी वर्षा, बाढी र पहिरोले ठूलो धनजनको क्षति पुर्‍याउँदै आएको छ। मनसुनको अन्त्यतिर विकसित हुने माैषमी प्रणालीले भयंकर रूप लिने गरेकाे विगतका विनासकारी घटनाहरूलाई बिर्सन नहुने मौसमविद्हरू बताउँछन् ।

मौसम पूर्वानुमान र यसको सम्भावित असरबारे जलवायु तथा मौसमविद् डा. विनोद पोखरेलले सतर्क रहन आग्रह  गर्दै सामाजिक संञ्जाल एक्समा लेख्छन,  “आर्को हप्ता बंगालको खाडीमा बन्ने सम्भावना भएको चक्रवात नेपालतिरै आउने पूर्वानुमान कायमनै छ तर ठाउँ भने अझै भन्न सकिन्न। अझै पनि पक्का छैन, तर सचेत चाहिँ हुँदै गर्नुपर्छ।”

मौसम विश्लेषणमा प्रयोग हुने दुई प्रमुख विश्वव्यापी मोडलहरू इसिएमडब्लुएफ र जिएफएसले  सम्भावित वर्षाको भूगोल र विस्तार फरक-फरक देखाएका छन् । एउटा मोडलले निश्चित क्षेत्रमा बढी केन्द्रित वर्षा देखाएको छ भने अर्को मोडलले अर्कै भागमा असर पर्ने सङ्केत गरेको छ। मोडलहरूबीच यस्तो मतभिन्नता हुनुले चक्रवातको दिशा र तीव्रतामा अझै अनिश्चितता रहेको पुष्टि गर्छ। तर, दुवै मोडलले वर्षाको ठूलो सम्भावनालाई भने नकार्न सकेका छैनन्।