मुस्ताङको लोमान्थाङ केन्द्रबिन्दु भै ५.३ म्याग्निच्युडको भूकम्प

हिमाली जिल्ला मुस्ताङको लोमान्थाङ आसपास केन्द्रबिन्दु बनाएर मङ्गलवार राति भूकम्प गएको छ। राष्ट्रिय भूकम्प मापन तथा अनुसन्धान केन्द्रका अनुसार राति ९:५३ बजे ५.३ म्याग्निच्युडको भूकम्प मापन गरिएको हो ।

युरोपियन-मेडिटेरेनियन सिस्मोलोजिकल सेन्टरका अनुसार भूकम्पको केन्द्र जमिनको सतहबाट करिब ३५ किलोमिटर गहिराइमा रहेको थियो। लोमान्थाङ क्षेत्रमा गएको यस भूकम्पको धक्का छिमेकी जिल्लाहरू मनाङ, म्याग्दी, डोल्पासम्म महसुस गरिएको थियो।

नेपाल प्रहरी तथा स्थानीय प्रशासनका अनुसार भूकम्पका कारण हालसम्म कुनै मानवीय तथा ठूलो भौतिक क्षतिको विवरण प्राप्त भएको छैन।

रातको समयमा भूकम्पको कडा धक्का महसुस भएपछि लोमान्थाङ तथा आसपासका बासिन्दाहरू घरबाहिर निस्किएका थिए। यसअघि पनि हिमाली क्षेत्रमा निरन्तर ससाना भूकम्पीय कम्पनहरू रेकर्ड हुँदै आएका छन्।

भौगर्भिक दृष्टिकोणले संवेदनशील क्षेत्र भएकाले स्थानीय प्रशासनले सतर्कता अपनाउन र सुरक्षाका उपायहरू पालना गर्न आग्रह गरेको छ। भूकम्पबाट पुगेको क्षतिको थप विवरण सङ्कलन गर्न जिल्ला सुरक्षा निकायहरू परिचालन गरिएको छ।