सुन सफा गर्ने बहानामा ठगी गर्ने चार भारतीय नागरिक म्याग्दीबाट पक्राउ

गहना सफा गरिदिने बहानामा रासायनिक पदार्थ (केमिकल) को प्रयोग गरी सुनको तौल घटाएर ठगी गरेको अभियोगमा प्रहरीले चार जना भारतीयलाई पक्राउ गरेको छ ।

जिल्ला प्रहरी कार्यालय म्याग्दीले जारी गरेको प्रेस विज्ञप्ति अनुसार, भदौ ३ गते दिउँसो मालिका गाउँपालिका- ६, ढाडखर्कमा गहना सफा गर्ने बहानामा विभिन्न केमिकल प्रयोग गरी सुनको तौल घटाएर ठगी गरेको सूचनापछि इलाका प्रहरी कार्यालय दरबाङको प्रहरी टोलीले भदौ ४ गते दिउँसो उनीहरूलाई नियन्त्रणमा लिएको हो।

प्रहरीका अनुसार पक्राउ पर्ने व्यक्तिहरूमा भारत, बिहार राज्य, खगरिया घर भएका क्रमशः विक्रम कुमार (२९ वर्ष),  संजीत कुमार (३२ वर्ष), राज कुमार साह (३५ वर्ष) सन्नि कुमार दास (२१ वर्ष) रहेका छन ।

पक्राउ परेका चारै जनामाथि ठगी सम्बन्धी कसूर मुद्दामा जिल्ला अदालत म्याग्दीबाट ५ (पाँच) दिनको म्याद थप अनुमति लिई थप अनुसन्धान भइरहेको सूचना अधिकारी प्रहरी निरीक्षक सागर तिमिल्सिनाले बताए ।