निर्मल पुर्जाको निधनपछि दाइ कमलबहादुरको भावुक वक्तव्य : “निर्मल केवल मेरो भाइ थिएनन्, मेरो मुटु थिए”

विश्वप्रसिद्ध नेपाली पर्वतारोही निर्मल “निम्सदाइ” पुर्जाको निधनपछि उहाँका माइला दाइ कमलबहादुर पुर्जाले परिवारका तर्फबाट भावुक वक्तव्य जारी गर्दै विश्वभरबाट प्राप्त प्रार्थना, साथ र सद्भावप्रति कृतज्ञता व्यक्त गरेका छन्।

सामाजिक सञ्जालमार्फत सार्वजनिक गरिएको वक्तव्यमा कमलबहादुरले आफूले अन्तिम समयसम्म भाइ र उहाँसँग रहेका सबै पर्वतारोहीहरू सकुशल फर्किने आशा र प्रार्थना गरेको उल्लेख गरेका छन्। तर आफूहरूले अपेक्षा गरेअनुसार परिणाम आउन नसकेको भन्दै अत्यन्त भारी मनका साथ भाइ निर्मल पुर्जा र उहाँसँग रहेका अन्य पर्वतारोही अब जीवित नरहेको दुःखद समाचार साझा गर्नुपरेको बताएका छन्।

“मलाई लाग्छ, मैले मेरो सम्पूर्ण संसार नै गुमाएको छु। निर्मल केवल मेरा कान्छा भाइ मात्र थिएनन्, उनी मेरो मुटु थिए,” उनले वक्तव्यमा उल्लेख गरेका छन्। परिवारले भोगिरहेको पीडालाई शब्दमा व्यक्त गर्न नसकिने भन्दै उनले संसारभरबाट प्रार्थना गर्ने, सन्देश पठाउने र परिवारको साथमा उभिने सबैप्रति आभार व्यक्त गरेका छन्।

कमलबहादुरले उक्त घटनामा ज्यान गुमाउने अन्य पर्वतारोहीका परिवारप्रति पनि गहिरो समवेदना प्रकट गरेका छन्। “आज हाम्रो परिवार मात्र होइन, दश परिवार अकल्पनीय शोकमा छन्। हामी सबैको पीडा साझा छ,” उनले उल्लेख गरेका छन्।

वक्तव्यमा उनले निर्मल पुर्जाको साहस, अठोट र मानवीय सेवाप्रतिको समर्पणको स्मरण गर्दै उहाँले मानव क्षमताको सीमालाई चुनौती दिएको र संसारभरका लाखौँ मानिसलाई “असम्भव भन्ने केही हुँदैन” भन्ने विश्वास दिलाएको बताएका छन्।

दाइका रूपमा आफू सधैँ भाइको सुरक्षाको चिन्तामा रहने गरेको स्मरण गर्दै उनले फेरि एकपटक उनलाई सुरक्षित घर फर्कन आग्रह गर्न पाएको भए भन्ने पीडा पनि व्यक्त गरेका छन्।

कमलबहादुरले निर्मलको योगदानप्रति परिवार सधैँ गर्व गर्ने उल्लेख गर्दै उनले परिवार मात्र नभई दाना गाउँ, म्याग्दी जिल्ला, धौलागिरि क्षेत्र, चितवन, नेपाल, गोरखा समुदाय, ब्रिटिश आर्मी, स्पेसल बोट सर्विस (एसबीएस), शेर्पा तथा विश्व पर्वतारोहण समुदायलाई समेत गौरवान्वित बनाएको बताएका छन्।

“तपाईंले लाखौँ मानिसलाई प्रेरणा दिनुभयो। तपाईंको विरासत सधैँ जीवित रहनेछ,” वक्तव्यमा भनिएको छ।

अन्त्यमा उनले आफ्ना प्रिय भाइप्रति श्रद्धाञ्जलि अर्पण गर्दै भगवानले उहाँको आत्मालाई चिरशान्ति प्रदान गरून् भन्ने कामना गरेका छन्। साथै, दुःखको यस घडीमा परिवारसँग ऐक्यबद्धता जनाउने विश्वभरका शुभेच्छुकप्रति पुनः हार्दिक कृतज्ञता व्यक्त गरेका छन्।

कमलबहादुर पुर्जाको वक्तव्य (पूर्ण पाठ) हामीले नेपालीमा उल्थागरी राखेका छाैं ः 

विश्वभर रहेका मेरा आदरणीय परिवारजन तथा साथीहरू,

नमस्कार। 

यो सन्देश कसरी लेखूँ भन्ने नै थाहा छैन। मैले मनैदेखि प्रार्थना गरेको थिएँ—आज तपाईंहरूसामु कुनै सुखद समाचार बाँड्न पाऊँ भनेर। संसारभरिका लाखौँ शुभेच्छुकहरूले मेरा कान्छा भाइ निर्मल (निम्सदाइ) र उहाँसँग रहेका सबै पर्वतारोहीहरूको सकुशल फिर्तीका लागि प्रार्थना गर्नुभयो। तर दुर्भाग्यवश, हाम्रो प्रार्थनाले हामीले चाहेको परिणाम ल्याउन सकेन।

अत्यन्तै भारी मनका साथ यो दुःखद खबर साझा गर्न बाध्य भएको छु कि मेरा अत्यन्त प्रिय कान्छा भाइ निर्मल “निम्सदाइ” पुर्जा र उहाँसँग रहेका अन्य पर्वतारोहीहरू अब हामीबीच रहनुभएन।

मलाई लाग्छ, मैले मेरो सम्पूर्ण संसार नै गुमाएको छु। उहाँ केवल मेरा कान्छा भाइ मात्र हुनुहुन्थेन, उहाँ मेरो मुटुको टुक्रा हुनुहुन्थ्यो। आज हाम्रो परिवारले भोगिरहेको पीडालाई शब्दमा व्यक्त गर्ने सामर्थ्य मसँग छैन।

उहाँको जीवनका लागि प्रार्थना गर्ने, आशा नरोक्ने, फोन गर्ने, सन्देश पठाउने र साथ दिने संसारभरिका प्रत्येक व्यक्तिप्रति म हृदयदेखि नै आभारी छु। तपाईंहरूको माया, साथ र सद्भावनाको मूल्य शब्दले कहिल्यै व्यक्त गर्न सकिँदैन।

आज केवल हाम्रो परिवार मात्र होइन, दश परिवार अकल्पनीय शोकमा डुबेका छन्। यस दुःखद घटनामा आफ्ना प्रियजन गुमाउनु भएका सम्पूर्ण परिवारप्रति मेरो हार्दिक समवेदना व्यक्त गर्दछु। हामी तपाईंहरूको पीडामा समान रूपमा सहभागी छौँ, र हाम्रो मन पनि तपाईंहरूसँगै रोइरहेको छ।

प्रिय भाइ निर्मल, हामीले जीवनको हरेक दिन तपाईंलाई सम्झिरहनेछौँ।

तपाईंले आफ्नो सम्पूर्ण जीवन संसारलाई एउटा सन्देश दिन समर्पित गर्नुभयो—साहस, अठोट र करुणा एकसाथ भए असम्भव भन्ने केही हुँदैन। तपाईंले मानव क्षमताको सीमालाई चुनौती दिनुभयो र विश्वभरिका करोडौँ मानिसलाई “असम्भव केही छैन” भन्ने विश्वास दिलाउनुभयो।

दाइका रूपमा म सधैँ तपाईंको सुरक्षाको चिन्ता गर्थें। कहिलेकाहीँ तपाईंलाई गाली पनि गर्थें, किनकि म तपाईंलाई असाध्यै माया गर्थें र तपाईं सुरक्षित घर फर्किनुभएको हेर्न चाहन्थें। आज लाग्छ, काश! ती शब्दहरू तपाईंलाई एकपटक फेरि भन्न पाएको भए।

हाम्रा बुबाआमाले हामीलाई प्रेम, सम्मान र पारिवारिक मूल्य सिकाएर हुर्काउनुभयो। तर यति चाँडै तपाईंलाई सदाका लागि बिदाइ गर्नुपर्ला भन्ने कल्पनासमेत गरेका थिएनौँ।

हाम्रो मन टुक्रिएको छ, तर तपाईंप्रति हाम्रो गर्व कहिल्यै मर्ने छैन। तपाईंको योगदान र विरासत सधैँ जीवित रहनेछ।

तपाईंले हाम्रो परिवारलाई गर्व गर्न लायक बनाउनुभयो।
दाना गाउँलाई गर्व गर्न लायक बनाउनुभयो।
म्याग्दी जिल्लालाई गर्व गर्न लायक बनाउनुभयो।
धौलागिरिलाई गर्व गर्न लायक बनाउनुभयो।
चितवनलाई गर्व गर्न लायक बनाउनुभयो।
नेपाललाई गर्व गर्न लायक बनाउनुभयो।
गोरखा समुदायलाई गर्व गर्न लायक बनाउनुभयो।
ब्रिटिश आर्मी र एसबीएसलाई गर्व गर्न लायक बनाउनुभयो।
शेर्पा तथा विश्व पर्वतारोहण समुदायलाई गर्व गर्न लायक बनाउनुभयो।
र सबैभन्दा ठूलो कुरा—तपाईंले संसारभरका लाखौँ मानिसलाई प्रेरणा दिनुभयो।

मेरो प्यारो कान्छा, मेरो बाबु, जीवनभर म तिमीलाई माया गरिरहनेछु। तिमी सधैँ मेरो हृदयमा जीवित रहनेछौ। यदि अर्को जन्म भन्ने केही छ भने, भगवानले फेरि हामीलाई एउटै परिवारमा दाजुभाइ भएर जन्मिने सौभाग्य प्रदान गरून् भन्ने प्रार्थना गर्दछु।

भगवानले तिम्रो पवित्र आत्मालाई चिरशान्ति प्रदान गरून्।

शान्तिसँग विश्राम गर, मेरो प्रिय कान्छा बाबु।

अन्त्यमा, यी सबै कठिन घडीमा हामीसँगै उभिनुहुने, फोन गर्नुहुने, सन्देश पठाउनुहुने, प्रार्थना गर्नुहुने र हाम्रो परिवारलाई माया तथा साथ दिनुहुने संसारभरिका सम्पूर्ण शुभेच्छुकप्रति म हृदयदेखि नै कृतज्ञ छु। तपाईंहरूको प्रेम र साथ हामीले जीवनभर सम्झिरहनेछौँ।

हार्दिक कृतज्ञतासहित,

तपाईंहरूको आफ्नै,
कमलबहादुर पुर्जा