मुस्ताङको चैले नजिक घ्याकर खोलामा लेदोसहितको बाढी

मुस्ताङको वारागुङ मुक्तिक्षेत्र गाउँपालिका-३ चैलेस्थित घ्याकर खोलामा लेदोसहितको बाढी आउँदा जोमसोम-कोराला सडक खण्ड पूर्ण रूपमा अवरुद्ध भएको जिल्ला प्रहरी कार्यालय मुस्ताङले जनाएको छ ।

मुस्ताङ प्रहरीका अनुसार साँझ ६ बजे चैले छेउहुँदै झर्ने घ्याक खोलामा आएको बाढीले चैले गेट छेउको कालीगण्डकी पुल तरेपछि उकाले सुरू हुने स्थानमा सडक क्षति पुर्याएपछि छुक्साङ-चैले सडक खण्डमा सवारी आवागमन ठप्प भएको हो ।

मनसुनको सक्रियतासँगै मुस्ताङका विभिन्न सडक खण्डहरूमा बाढी र पहिरोको जोखिम बढेको छ। यसअघि पनि मुस्ताङमा बाढी र पहिरोका कारण सडक अवरुद्ध हुने गरेका घटनाहरू सार्वजनिक हुँदै आएका छन् ।

मुस्ताङ प्रहरीले सडक जोखिमपूर्ण रहेकाले सुरक्षा निकायले अर्को सूचना जारी नभएसम्म उक्त सडक खण्ड प्रयोग नगर्न र यात्रा गर्दा विशेष सावधानी अपनाउन सम्बन्धित सबैमा अनुरोध गरेको छ ।

पछिल्ला दिनहरूमा मनसुनी वर्षाका कारण नेपालका पहाडी तथा हिमाली क्षेत्रका सडकहरूमा पहिरो र बाढी नियमित जसो हुने गरेका छन् ।