अन्नपूर्ण गाउँपालिकाके ६१ करोड १४ लाखको बजेट पारित, ७५ प्रतिशत चालू खर्चमै

म्याग्दीको अन्नपूर्ण गाउँपालिकाले आगामी आर्थिक वर्ष २०८३/८४ का लागि कुल ६१ करोड १४ लाख ६९ हजार रुपैयाँको बजेट सर्वसम्मत पारित गरेको छ।

गाउँसभाको २३ औं अधिवेशनले “समृद्ध अन्नपूर्ण निर्माणको आधार: दिगो कृषि, पर्यटन, ऊर्जा र उत्थानशील पूर्वाधार” भन्ने नाराका साथ नयाँ बजेट पारित गरेको हो।

गाउँपालिकाका अध्यक्ष भारत कुमार पुनद्वारा जारी प्रेस नोटका अनुसार विनियोजित कुल बजेटमध्ये चालुतर्फ ४५ करोड ८६ लाख २ हजार रुपैयाँ (७५ प्रतिशत) र पूँजीगततर्फ १५ करोड २८ लाख ६७ हजार रुपैयाँ (२५ प्रतिशत) रहेको छ। गाउँपालिकाले शैक्षिक सुधार, कृषि व्यवसायीकरण, पर्यटन प्रवर्द्धन, स्वास्थ्यमा पहुँच र प्रविधिमैत्री सुशासनलाई मुख्य प्राथमिकतामा राखेको प्रमुख प्रशासकीय अधिकृत कपिल पाण्डेले बताए।

बजेटको खर्च संरचना हेर्दा गाउँपालिकाको प्रशासनिक र प्रशासनिक-योजना कार्यतर्फ सबैभन्दा ठूलो हिस्सा अर्थात् २३ करोड ११ लाख ४० हजार रुपैयाँ विनियोजन गरिएको छ। यस्तै, वडा कार्यालयहरूबाट प्राप्त सिफारिसका आधारमा कार्यान्वयन गरिने विकास कार्यक्रम तथा योजनाहरूका लागि ८ करोड ३६ लाख रुपैयाँ छुट्याइएको छ । शाखाहरूबाट प्रस्तावित कार्यक्रम तथा योजनाहरूका लागि ५ करोड ४४ लाख ६७ हजार रुपैयाँ विनियोजन गरिएको छ।

बजेटको ७५ प्रतिशत हिस्सा चालू प्रकृतिको खर्चमा सकिने र पूँजीगततर्फ मात्र २५ प्रतिशत बजेट हुनुले भौतिक पूर्वाधार र प्रत्यक्ष उत्पादनशील क्षेत्रमा अपेक्षित बजेट पुग्न नसकेको संकेत गर्दछ।

अन्नपूर्ण गाउँपालिकाको आम्दानीको मुख्य स्रोत संघीय सरकारकै अनुदान रहेको छ। आयतर्फ संघीय सरकारको वित्तीय समानीकरण अनुदान र राजस्व बाँडफाँडमार्फत मात्रै ५२ करोड ९८ लाख ५६ हजार रुपैयाँ (८६ प्रतिशत बढी) प्राप्त हुने अनुमान छ।

गाउँपालिकाले आन्तरिक आयबाट २ करोड ५० लाख रुपैयाँ संकलन गर्ने लक्ष्य राखेको छ, जुन कुल बजेटको करिब ४.०९ प्रतिशत मात्रै हुन आउँछ।

गाउँपालिकाले चालु आर्थिक वर्ष २०८२/८३ को जेठ मसान्तसम्मको खर्च विवरण पनि सार्वजनिक गरेको छ। जसअनुसार जेठ मसान्तसम्म कुल विनियोजित बजेटको ४९.१४ प्रतिशत अर्थात् ३० करोड १७ लाख ३६ हजार रुपैयाँ मात्र खर्च भएको छ।

यसमध्ये चालू खर्चतर्फ ५९.६८ प्रतिशत (२२ करोड ५२ लाख ७५ हजार रुपैयाँ) र पूँजीगततर्फ मात्र ३२.३२ प्रतिशत (७ करोड ६४ लाख ६१ हजार रुपैयाँ) खर्च भएको छ। निर्माणको अन्तिम चरणमा रहेका ठूला योजनाहरूको भुक्तानी असार महिनामा हुने भएकाले केही दिनभित्रै पूँजीगत खर्चको प्रगतिमा उल्लेख्य सुधार आउने दाबी गाउँपालिकाले गरेको छ।