नेपालमा मनसुन प्रवेश : यस वर्ष ६ दिन ढिलो गरी भित्रियो मनसुनी वायु

नेपालमा यस वर्षको मनसुन प्रणाली औपचारिक रूपमा प्रवेश गरेको छ। जल तथा मौसम विज्ञान विभागले आज असार ५ गते (१९ जुन) एक सूचना जारी गर्दै कोशी प्रदेशका केही भू-भागबाट मनसुन भित्रिएको जानकारी दिएको छ।

विभागका अनुसार नेपालमा मनसुन भित्रिने सरदर मिति जुन १३ हो, तर यस वर्ष ६ दिन ढिलो गरी मनसुन प्रवेश गरेको छ। हाल मनसुन प्रणाली कमजोर अवस्थामा रहेकाले देशका अन्य भू-भागमा विस्तार हुन अझै केही दिन लाग्ने विभागले जनाएको छ।

मनसुन सुरु भएसँगै पूर्वी भू-भागमा वर्षाको सम्भावना बढेको छ भने पश्चिमी भू-भागमा अझै गर्मी कायमै छ। मौसमको यस्तो असमान अवस्थाले जनजीवनमा प्रतिकूल असर पार्न सक्ने भएकाले सचेत रहन आवश्यक छ। जल तथा मौसम विज्ञान विभागले मनसुनी प्रणालीलाई निरन्तर अनुगमन गरिरहेको र सोही अनुसार नियमित रूपमा अद्यावधिक गर्दै जाने जानकारी दिएको छ।

आम नागरिकलाई आधिकारिक सूचनाका लागि महाशाखाबाट जारी हुने तीन दिने मौसम बुलेटिन नियमित रूपमा हेर्न र अद्यावधिक जानकारी लिन विभागले अनुरोध गरेको छ।