बैंकिङ कसूर मुद्दामा फरार ४४ बर्षिया महिला बेनीमा पक्राउ

बैंकिङ कसूर मुद्दामा सम्मानित अदालतबाट कैद सजाय फैसला भई फरार रहेकी एक महिलालाई म्याग्दी प्रहरीले पक्राउ गरेको छ।

पक्राउ पर्नेमा साविक पर्वत जिल्ला जलजला गाउँपालिका, ३ घर भै म्याग्दीको बेनी नगरपालिका, ८ बस्ने ४४ वर्षीया सीता बरुवाल रहेकी छन्।

निरकुमारी भण्डारीको जाहेरीले वादी नेपाल सरकार रहेको बैंकिङ कसूर मुद्दामा म्याग्दी अदालतले बरुवालमाथि २ (दुई) वर्ष कैद सजाय सुनाएको थियो। प्रहरीका अनुसार अदालतको फैसलापछि फरार रहेकी बरुवाललाई जिल्ला प्रहरी कार्यालय म्याग्दीबाट बेनी नगरपालिका, ८ उनकै घर/डेराबाट पक्राउ गरेको हो।

पक्राउ परेकी बरुवाललाई कैद फैसला कार्यान्वयनका लागि सम्मानित म्याग्दी जिल्ला अदालतमा उपस्थित गराइएको प्रहरी सूचना अधिकारीसमेत रहेका प्रहरी निरीक्षक सागर तिमिल्सिनाले जानकारी दिए।