अवैध स्लेट ढुङ्गासहितको ट्रक प्रहरी नियन्त्रणमा

म्याग्दी प्रहरीले बेनी नगरपालिका-४ बाट अवैध रूपमा लोड गरी राखिएको ठूलो परिमाणको कटिङ्ग ढुङ्गासहित एउटा ट्रकलाई नियन्त्रणमा लिएको छ।

विशेष सूचनाका आधारमा जिल्ला प्रहरी कार्यालय म्याग्दीबाट खटिएको प्रहरी टोलीले जेठ १५ गते राति अन्दाजी ९.४० बजे पश्चिम मालिका गाउँपालिका तर्फबाट बेनी तर्फ ल्याउँदै गरेका स्लेट ढुङ्गा बेनी नगरपालिका, ४ स्थित सडकबाट गाडीसहित नियन्त्रणमा लिएकाे हाे । प्रहरीले शंकास्पद रूपमा रोकी राखेको ना ५ ख २२४५ नम्बरको ट्रक जाँच गर्ने क्रममा उक्त अवैध ढुङ्गा फेला पारेको उल्लेख गरेकाे छ। प्रहरीले ति ढुङ्गा कस्ले, कहाँबाट ल्याएको र कहाँ लैजाँदै थियाे भन्ने खुलाएकाे छैन ।

प्रहरीका अनुसार उक्त ट्रकमा बिना इजाजत अवैध रूपमा लोड गरिएका ४ हजार ३ सय ९० (४३९०) थान (पिस) कटिङ्ग ढुङ्गाहरू छन्। बरामद गरिएको ढुङ्गा र ट्रकसहित आवश्यक कारबाहीका लागि डिभिजन वन कार्यालय म्याग्दीमा पठाइएको जिल्ला प्रहरी कार्यालय म्याग्दीका सूचना अधिकारी सागर तिमिल्सिनाले जानकारी दिए।