जबर्जस्ती करणीको आरोपमा धवलागिरीका ५३ वर्षीय सुनार पक्राउ

म्याग्दीमा एक १३ वर्षीया बालिकालाई जबर्जस्ती करणी गरेको आरोपमा एक जना पक्राउ परेका छन्।

पक्राउ पर्नेमा म्याग्दीको धवलागिरी गाउँपालिका वडा नं. ०७ बस्ने ५३ वर्षीय धन बहादुर सुनार रहेका प्रहरीले जनाएको छ । जिल्ला प्रहरी कार्यालय म्याग्दीका सूचना अधिकारी एवं प्रहरी निरीक्षक (प्र.नि.) सागर तिमिल्सिनाका अनुसार गत जेठ १२ गते दिउँसो अन्दाजी १७:०० बजेको समयमा परिवर्तित जिल्ला ४३ अन्तर्गत बस्ने वर्ष १३ की बालिकालाई सुनारले जबर्जस्ती करणी गरेको जाहेरी परेपछि प्रहरीले उनलाई नियन्त्रणमा लिएको हो।

जिल्ला प्रहरी कार्यालय म्याग्दी र प्रहरी चौकी मुना ताकम म्याग्दीबाट खटिएको संयुक्त प्रहरी टोलीले जेठ १६ गते सुनारलाई नियन्त्रणमा लिएको प्रहरीले जनाएको छ। पक्राउ परेका सुनारमाथि सम्मानित म्याग्दी जिल्ला अदालतबाट ‘करणी सम्बन्धी कसूर (जबर्जस्ती करणी)’ मुद्दा शीर्षकमा दिन ५ (पाँच) को म्याद थप अनुमति लिई थप अनुसन्धान भइरहेको प्रहरी निरीक्षक तिमिल्सिनाले जानकारी दिए।