कालीगण्डकीको उद्गमस्थलमै वोरिङगरी पानी वितरण गरिँदै

कालीगण्डकी नदीको उद्गमस्थल लोमन्थाङ्ग स्थित मुस्ताङ हिमालको फेदीमा अवस्थित कोरला भन्सार नाकामा खानेपानी आपूर्ति ब्यवस्था मिलाउन डिप वोरिङबाट पानी निकाल्ने प्रयास थालिएको छ ।
नेपालको उत्तरी कुनोमा अवस्थित तिब्बती पठारको वल्लो छेउमा अवस्थित फराकिलो कोरला पठारमा नजिकै पानीको मुहान नभएको र पश्चिमपट्टी अवस्थित हिमाल फेदीबाट पनि पानी ल्याउन असम्भव प्रायः रहेकोले वोरिङ प्रविधीबाट पानी निकाल्ने प्रयत्न थालिएको लोमन्थाङ गाउँपालिकाले जनाएको छ ।
लोमन्थाङ गाउँपालिका अध्यक्ष टशीनर्वु गुरुङका अनुसार नेपाल–चीन वीचको ३२ नम्बर सीमास्तम्भ रहेको कोरला भन्सार नाकामा ब्यवसाय गर्ने ब्यवसायी र त्यहाँ पुग्ने पर्यटकलाई पानीको सुविधा पु¥याउन बोरिङ प्रविधीबाट पानी निकाल्न थालिएको हो ।
अध्यक्ष गुरुङका अनुसार पानी ब्यवस्थापन हुने भएसँगै कोरला नाकामा ६ वटा शौचालय पनि बनाईएको छ । यस अघी लाखौ पर्यटक पुग्ने कोरलामा प्रयोग गर्ने पानी नहुँदा शौचालय बनाउन सकिएको थिएन तर पर्यटकहरुले भने शौचालय नभएको भनी आलोचना हुने गरेको थियो ।
कोरला खानेपानी बोरिङ योजनाको लोमान्थाङ गाउँपालिकाका अध्यक्ष टसीनर्बु गुरुङले शिलन्यास गर्दै अध्यक्ष गुरुङले बोरिङ खानेपानी योजनाले नाकामा ब्यापार व्यवसाय गर्ने, कोरलानाकाको अवलोकन गर्न आउने पर्यटक र कोरलानाकाबाट आयात तथा निर्यात गर्ने ब्यापारी लाभान्वित हुने बताए ।
खानेपानीको व्यवस्थापन गर्ने गरी गाउँपालिकाले कोरलानाकामा शौचालय निर्माण गरिरहेको उनको भनाई छ । कोरलानाकामा बोरिङबाट खानेपानीको व्यवस्था मिलाउन लोमान्थाङ गाउँपालिकाले एशियन कन्ट्रक्सन एण्ड ड्रिलिङ दोलखासँग भ्याटसहित ३० लाख लागतमा सम्झौता गरी योजनाको काम सुरु भएको गाउँपालिकाका प्रमुख प्रशासकीय अधिकृत न्युटर्न लम्सालले जानकारी दिए ।