पर्वतको कुश्मामा ईभी माइक्रो दुर्घटना, १० जना यात्रु घाइते, चालक प्रहरी नियन्त्रणमा

पर्वतको कुश्मा नगरपालिका–४ माझमेलास्थित कुश्मा–बागलुङ सडक खण्डमा आज दिउँसो एउटा विद्युतीय सवारी (ईभी) माइक्रो दुर्घटना हुँदा सवार १० जना यात्रु घाइते भएका छन् ।
म्याग्दी सदरमुकाम बेनीबाट पोखरातर्फ जाँदै गरेको ग १ ज ८६७५ नम्बरको ईभी माइक्रो दिउँसो करिब ३:०० बजे सडकबाट चिप्लिएर बायाँतर्फको नालीमा पल्टिएको जिल्ला प्रहरी कार्यालय पर्वतले जनाएको छ ।
घाइते र उपचारको अवस्था सवारीमा चालकसहित जम्मा ११ जना सवार रहेका थिए । घाइते हुनेहरूमा म्याग्दी, कास्की र पर्वतका गरी १० जना छन् ।
घाइतेमध्ये म्याग्दी बेनीकी ६० वर्षीया देवी खत्री र पहिचान नखुलेकी करिब ५० वर्षीया लिला नाम गरेकी महिलाको अवस्था मध्यम रहेको छ भने अन्य ८ जनाको अवस्था सामान्य छ । सबै घाइतेहरूको हाल पर्वत जिल्ला अस्पताल कुश्मामा उपचार भइरहेको छ ।
प्रहरीले चालक कास्की पोखरा महानगरपालिका–११ हेम्जा बस्ने २५ वर्षीय मिलन सुनारलाई नियन्त्रणमा लिएको छ ।