बेनीमा पार्किङमा राखेको जिपमा आगजनी गर्ने युवक पक्राउ, अनुसन्धानका लागि म्याद थप

म्याग्दीको बेनी नगरपालिका वडा नं. २, हाडेभिरमा पार्किङ गरी राखिएको एक थान बोलेरो जिपमा आगजनी गर्ने व्यक्तिलाई प्रहरीले पक्राउ गरेको छ।
गएको चैत १० गते बिहान करिब ५:३० बजेको समयमा हाडेभिरमा पार्किङ गरी राखिएको ग २ च १०५४ नम्बरको बोलेरो डबल क्याब जिपमा आगजनी गरिएको थियो। आगलागीबाट जिपको भित्री भाग पूर्ण रूपमा जलेर नष्ट भएको छ।
घटनाको अनुसन्धानका क्रममा प्रहरीले पर्वत जिल्लाको जलजला गाउँपालिका वडा नं. ७, धाइरिङ बस्ने २१ वर्षीय राजकुमार परियारलाई चैत १२ गते बेनी नगरपालिका-२ बाट पक्राउ गरेको हो।
पक्राउ परेका परियार विरुद्ध ‘अपराधिक उपद्रव’ सम्बन्धी कसूरमा मुद्दा दर्ता गरी म्याग्दी जिल्ला अदालतबाट ५ (पाँच) दिनको म्याद थप गरी थप अनुसन्धान भइरहेको जिल्ला प्रहरी कार्यालय म्याग्दीले जनाएको छ।