गलेश्वरधाममा श्री मुक्तिहरि राधाकृष्ण भगवानको ३० औँ ब्रह्मोत्सव हुने

श्रीमुक्तिहरि राधाकृष्ण मन्दिर (श्रीरामानुज मठ सन्तसेवाश्रम) बेनी नगरपालिका-९, गलेश्वरधामकाे अायाेजनामा प्रसिद्ध धार्मिक स्थल गलेश्वरधाममा श्री मुक्तिहरि राधाकृष्ण भगवानको ३० औँ वार्षिक उत्सव (ब्रह्मोत्सव) को अवसरमा श्रीमद्भागवत सप्ताह एवं साप्ताहिक हवन आयोजना हुने भएको छ।
श्रीमुक्तिहरि राधाकृष्ण मन्दिरका घनश्याम मुमुक्षुका अनुसार मुक्ति क्षेत्र पुलस्त्य पुलहाश्रमअन्तर्गत श्रीमुक्तिनारायण रामानुज जीयर स्वामीजी महाराजद्वारा स्थापित यस मन्दिरमा आगामी फागुन ७ गतेदेखि विशेष अनुष्ठान सुरु हुनेछ।
मन्दिर व्यवस्थापन समितिले सार्वजनिक गरेको कार्यतालिका अनुसार २०८२ फागुन ७ गतेदेखि १४ गतेसम्म चल्ने कार्यक्रममा बिहान ७ बजेदेखि पूजन, हवन र यज्ञानुष्ठानसहित पाठपारायण, दिउँसो १२:३० बजेदेखि अपरान्ह ४ बजेसम्म कथा वाचन र फागुन ११ गते नन्दोत्सव, १३ गते भगवानको महा-अभिषेक र समापनको दिन १४ गते भव्य पालकी उत्सव आयोजना गरिनेछ।