म्याग्दीमा जिप दुर्घटनामा ६ जना घाइते, चालक नियन्त्रणमा

धवलागिरी गाउँपालिका-४ केराबारीमा बिहीबार दिउँसो एक बोलेरो जिप दुर्घटना हुँदा ६ जना घाइते भएका छन्।
नाउराबाट बेनीतर्फ आउँदै गरेको ग १ च ७२२२ नम्बरको जिप सडकबाट करिब २५ मिटर तल खस्दा दुर्घटना भएको हो। बिहीबार दिउँसो करिब १:५० बजेको समयमा भएको उक्त दुर्घटना ‘ब्रेक फेल’ भएका कारण भएको प्रारम्भिक अनुमान गरिएको छ। दुर्घटना लगतै स्थानीय र प्रहरीको सहयोगमा घाइतेहरूको उद्धार गरी उपचारका लागि आधारभूत स्वास्थ्य चौकी दरवाङ पुर्‍याइएको छ।
जिपमा चालकसहित ७ जना सवार थिए। घाइते हुनेहरूमा धवलागिरी-४, का टिका घर्ती (४० वर्ष), तोरमखाँद-५, अछामका खगेन्द्र शाही, चन्द्रपुर-१, रौतहटका मनिराज लुङ्गेली (३९ वर्ष), तुरमखान-५, अछामका निरक शाही (२० वर्ष), पालदिङ तामाङ (३४ वर्ष) निक्लाजुङ-४, पाँचथर र धवलागिरी-४, म्याग्दीका छयन्द्र घर्ति (२२ वर्ष) रहेको जिल्ला प्रहरी कार्यालय बेनीले जनाएके छ ।
दुर्घटनाको खबर प्राप्त हुनासाथ इलाका प्रहरी कार्यालय दरवाङबाट प्रहरी टोली खटिएको थियो। जिप चालक धवलागिरी गाउँपालिका-४ बगर बस्ने ३७ वर्षीय नन्द बहादुर सुनारलाई प्रहरीले नियन्त्रणमा लिएको छ। जिप अहिले पनि घटनास्थलमै रहेको र घटनाबारे थप अनुसन्धान भइरहेको प्रहरीले जनाएको छ।