अर्थमन्त्री खनालद्वारा म्याग्दीमा निर्वाचन तयारीको अनुगमन

आसन्न प्रतिनिधि सभा सदस्य निर्वाचनको तयारीबारे बुझ्न अर्थमन्त्री रामेश्वर खनाल बुधवार म्याग्दीको निर्वाचन तयारीको वस्तुस्थितिबारे स्थलगत अनुगमन गरेका छन । निर्वाचन अनुगमन गर्न देश दौडाहामा रहेका मन्त्री खनालले आजै जिल्ला निर्वाचन कार्यालयमा पुगेर जिल्लाको सुरक्षा र तयारीबारे ब्रिफिङ लिएका थिए ।
सो अवसरमा म्याग्दीका प्रमुख जिल्ला अधिकारी रवीन्द्र आचार्य र अन्य सुरक्षा निकायका प्रमुखहरूले मन्त्री खनाललाई जिल्लाका मतदान स्थलहरूलाई अति संवेदनशील, संवेदनशील र सामान्य गरी वर्गीकरण गरिएको र सोही अनुरूप सुरक्षाकर्मी परिचालनको योजना बनाइएको व्रिफिङ गरेका थिए ।
अर्थमन्त्रीको निर्देशन ब्रिफिङपछि बोल्दै अर्थमन्त्री खनालले निर्वाचनलाई स्वच्छ, निष्पक्ष र धाँधलीरहित वातावरणमा सम्पन्न गर्न कुनै कसर बाँकी नराख्न निर्देशन दिए । मन्त्री खनाललाई बेनीमा प्रमुख जिल्ला अधिकारी आचार्यसहित नेपाल प्रहरी, सशस्त्र प्रहरी, नेपाली सेना, अनुसन्धान विभाग, निर्वाचन कार्यालयका प्रमुखहरूले स्वागत गरे ।