मंगला मावि बावियाचौरले जित्यो मंगलाको राष्ट्रिपति रनिङ शिल्डको उपाधि

मंगला गाउँपालिकाले आयोजना गरेको अन्तर माध्यमिक विद्यालय स्तरीय तेस्रो राष्ट्रपति रनिङ शिल्ड खेलकुद प्रतियोगिताको उपाधि मंगला मावि बावियाचौरले जितेको छ । आइतबार गाउँपालिका केन्द्र बावियाचौरमा सम्पन्न प्रतियोगतामा मंगला माविले १४ स्वर्ण, ३ रजत र २ कास्य पदक प्राप्त गरी विजेता घोषित भएको हो ।

यसैगरी उपविजेता महेन्द्र रत्न मावि वंरजाले ७ स्वर्ण,५ रजत ५ कास्य पदक प्राप्त गरेको छ । प्रतियोगितामा तृतीय भएको डनिङ बोर्डिङ स्कुल मंगला २ ले ५ स्वर्ण,२ रजत र ३ कास्य पदक हात पार्याे ।

राष्ट्रिय जनजागृति मावि पूर्ण गाउँले ३ स्वर्ण,४ रजत र ६ कास्य,दिपशिखा मावि कुहुँले १ स्वर्ण, ८ रजत, ७ कास्य,त्रिभुवन मावि मंगला २ ले २ कास्य,शिशु कल्याण मावि मंगला ५ ले ३ रजत २ कास्य र शिद्धशान्ति मावि मंगला २ हिदीले १ कास्य मात्र हात पारेको छ ।

प्रतियोगितामा प्रथम हुनेले रनिङ शिल्ड, ट्रफी सहित नगद ५० हजार रुपैयाँ पुरस्कार, द्धितीयले ३० हजार,तृतीय हुनेले २० हजार रुपैयाँ नगदका साथमा ट्रफी र मेडल पाएका छन् । प्रतियोगिताका विजेता विद्यालय र खेलाडीहरुलाई जिल्ला समन्वय समितिको उपप्रमुख डिलकुमारी खत्री,पालिका अध्यक्ष सतप्रसाद रोका,उपाध्यक्ष प्रेमकुमारी अधिकारी,प्रमुख प्रशासकीय अधिकृत पूर्णबहादुर खत्री,वडाअध्यक्ष र कार्यपालिका सदस्यहरु लगायतले नगद पुरस्कार,शिल्ड,मेडल र प्रमाणपत्र वितरण गरे।

तीन दिनसम्म सञ्चालन भएको प्रतियोगितामा छात्रछात्रा तर्फ एथलेटिक्स, कवड्डी र भलिबल गरी १५ वटा इभेन्ट्मा ३० वटा पदकका लागि प्रतिस्पर्धा भएको थियो । प्रतियोगितामा १० वटा विद्यालयले सहभागिता जनाएका थिए ।