कोरोना संक्रमणबाट सरकारी सेवाका दुई स्वास्थ्यकर्मीको एक साता भित्रै निधन

कोरोना संक्रमणबाट सरकारी सेवामा कार्यरत दुई जना स्वास्थ्यकर्मीको एक साता भित्रै निधन भएको छ । बरिष्ठ अर्थोपेडिक सर्जन डा हरिप्रसाद सापकोटा (५८) र सीअहेव रामसिकिल प्रसाद साह (५८)को चार दिनको अन्तरमा निधन भएको हो ।

कोरोेना संक्रमणमा परेका बरिष्ठ अर्थोपेडिक सर्जन डा हरिप्रसाद सापकोटाको विहीबार दिउसो ३ : १० बजे ज्यान गयो । उनी सरकारी सेवामा कार्यरत एघारौँ तहका बरिष्ठ चिकित्सक थिए । ५८ बर्षका उनी सुर्खेतस्थित प्रादेशिक अस्पतालमा कार्यरत थिए ।

उनमा गत २९ भदौमा कोरोना संक्रमण पुष्टि भएको थियो । स्वास्थ्य बिग्रँदै जाँदा उनलाई १ असोजमा नेपालगञ्जस्थित भेरी अस्पतालमा रिफर गरी त्यहाँबाट थप उपचार शुरु गरिएको थियो । पछिल्ला केही दिन स्वास्थ्यमा सुधार आएको भनिएपनि विहीबार विहानबाट एक्कासी बिग्रियो । अन्तत उनको ज्यान गयो ।

डा सापकोटा मात्रै होइन यो साता सरकारी सेवामा कार्यरत अर्का स्वास्थ्यकर्मीको पनि कोरोना संक्रमणबाट ज्यान गएको छ । पर्सा जिल्लाको जगरनाथपुर गाँउपलिकाको स्वास्थ्य शाखामा कार्यरत रामसिकिल प्रसाद साहको ५८ बर्षको उमेर गत १२ असोजका दिन काठमाडौँमा निधन भयो ।

मनरा नगरपालिका ७ महोत्तरी घर भएका उनलाई पनि थप उपचारका लागि १ असोजमा काठमाडौ ल्याइएको थियो । तर त्रिवि शिक्षण अस्पतालमा आइसीयू नपाएपछि उनलाई बुढानिलकण्ठस्थित करुणा अस्पतालमा लगिएको थियो । स्वास्थ्य विग्रँदै जाँदा उनलाई भेन्टिलेटरमा त राखियो तर ज्यान बचाउन सकिएन । १२ असोज विहान साढे ८ बजे उनको निधन भयो ।

यी दुई स्वास्थ्यकर्मीको उमेर समान छन् । रिफर भएको मिति पनि समान छ । मृत्युको कारण पनि समान छ । सरकारले कोरोनाबाट मृत्यु हुने स्वास्थ्यकर्मीको परिवारलाई २५ लाख क्षतिपूर्ति दिइने बताएको छ ।

स्वास्थ्य मन्त्रालयका प्रवक्ता डा जागेश्वर गौतम कोरोना संक्रमणको अवस्था झन जटिल मोडतर्फ सोझिएको भन्दै स्वास्थ्यकर्मी तथा आम सर्वसाधारणलाई सचेतता र सुरक्षित भएर आफ्ना कर्तव्य निर्वाह गर्न आग्रह गरेका छन् । उनले महामारीको यो समयमा कोरोना संक्रमणलाई ख्याल ठट्टाको रुपमा नलिन समेत आग्रह गरका छन् ।

‘हाम्रा लागि एक जनाको क्षति हुनुपनि दुखद हो । अझ हाम्रा सहकर्मी स्वास्थ्यकर्मी नै गुमाउनु पर्दाको पीडा त व्यक्त गर्न नसकिने खालको छ । तर हामी स्वास्थ्यकर्मीहरु यो महामारीको समयमा दृडताका साथ अघि बढ्नुको विकल्प छैन् । आम सर्वसाधारणले यसमा सहयोग पुरयाउनुपर्ने छ । त्यसका लागि हामीले भनेको मास्कको प्रयोग, सामाजिक दुरी कायम र सावुन पानीले हात धुने वा स्यानिटाइजर प्रयोग गर्ने काममा लाग्नुहोला,’ उनले भने ।