नेपालमा कोरोना संक्रमितको संख्या ४० हजार नाघ्यो

विश्वभर महामारीको रूप लिएको कोरोना भाइरसबाट नेपालमा पनि संक्रमित हुनेको संख्या ४० हजार नाघेको छ। हिजो सम्म पुष्टि भएका ३९ हजार ४६० जना संक्रमितमा आज १ हजार ६९ जना थपिएसँगै कूल संक्रमित संख्या ४० हजार ५२९ पुगेको हो।

नेपालमा २०७६ सालको माघ ९ गते चीनबाट आएका एक जनामा पहिलो पटक संक्रमण पुष्टि भएको थियो। त्यसपछि चैतको १० गते फ्रान्सबाट आएकी एक युवतीमा संक्रमण देखिएको थियो। त्यसपछि निरन्तर फैलिँदै गएको संक्रमणले अहिले दैनिक एक हजारको हाराहारीमा संक्रमण देखिन थालेको छ।

पछिल्लो २४ घण्टामा १२ हजार ८८ जनाको पीसीआर परीक्षण गरिएको छ भने हालसम्मको पीसीआर परीक्षण संख्या ७ लाख ५ हजार ५६० पुगेकाे छ। त्यस्तै गत २४ घण्टामा ७६८ जना कोरोना संक्रमण मुक्त भएर घर फर्किएका छन्। हालसम्म २२ हजार १७८ जना पूर्ण रूपमा निको भएका छन्।