सुटकेशमा शव प्रकरणः भेटियो हत्या भएको घर

काठमाडौंको गोंगबुस्थित गणेशथानमा सुटकेश भित्र शव भेटिएको प्रकरणमा प्रहरीलाई महत्वपूर्ण क्लू फेला परेको छ। घटनाको अनुसन्धानमा जुटेको प्रहरीले सोमबार मृतक व्यक्तिको पहिचान गरेको छ भने घटना भएको घरसमेत पत्ता लगाएको छ।

बव भेटिएको नजिकैको ४ तले घरमा सो घटना भएको तथ्य फेला परेको प्रहरीले जनाएको छ। महानगरी अपराध महाशाखाका प्रवक्ता एसपी ईश्वर कार्कीले घटनाबारे अनुसन्धान जारी रहेको बताए। उनले भने, ‘केही कुरा थाहा भएको छ। शवको पहिचान भएको छ। अनुसन्धान अगाडि बढिरहेको छ।’

यसअघि सोमबार प्रहरीले शवको सनाखत गरेको थियो। टाउको छिनालिएको अवस्थामा शव सुटकेशमा फेला परेको थियो। प्रहरीले सोमबार बिहानै शवको तस्वीरसहित पहिचानका लागि आह्वान गरेको थियो। त्यसपछि मृतक व्यक्ति दाङका कृष्णबहादुर बोहोरा रहेको खुलेको थियो। उनी काठमाडौंको नयाँ बजारस्थित एक गार्मेन्टमा कार्यरत रहेको प्रहरीले पत्ता लगाएको थियो।

वारदातस्थल र मृतकको पहिचान भए पनि हत्या कसले र किन गर्यो भन्ने विषयमा भने अझै स्पष्ट भइनसकेको प्रहरीले जनाएको छ।