नेपालमा कोरना संक्रमित चौध सय नाघ्यो, पाँच हजारलाई सङ्क्रमण हुने नयाँ प्रक्षेपण

स्वास्थ्य तथा जनसङ्ख्या मन्त्रालयका अनुसार नेपालमा कुल कोरोना सङ्क्रमितको सङ्ख्या १,४०१ पुगेको छ।
नेपालमा शनिवार थप १८९ जनामा कोरोना  सङ्क्रमण पुष्टि भएको छ। शनिवार एकै दिन हालसम्मकै सबैभन्दा बढी सङ्क्रमण पुष्टि भएको हो।
त्यसैविच सरकारले कोरोना सङ्क्रमितको सङ्ख्या पाँच हजारसम्म पुग्ने नयाँ अनुमान गर्दै त्यसअनुसार आवश्यक स्वास्थ्य सामग्रीको खरिद प्रक्रिया अगाडि बढाइएको अधिकारीहरूले बताएका छन् ।  यसअघि सरकारले नेपालमा झन्डै १,५०० मानिसमा कोरोना सङ्क्रमण अनुमान गर्दै त्यसै अनुसार स्वास्थ्य सामग्रीको जोहो गरेको थियो।
त्यसकालागी सरकारले  अत्यावश्यक हुने व्यक्तिगत सुरक्षा सामग्री (पीपीई), मास्क, पन्जा जस्ता सामान खरिदका लागि बोलपत्र आह्वान  गरेको छ। अहिले नेपालमा फेला परेका धेरै सङ्क्रमितहरू भारतबाट फर्किएका हुन् । भारतबाट हजारौँको सङ्ख्यामा नेपालीहरू फर्किएका र फर्किने क्रममा रहेका बेला यो प्रक्षेपण गरिएको हो ।