फेवातालमा जलकुम्भीको जगजगी

पुनहिल डट कम
४ साल अघि
२७० पटक पढिएको

हरेक बर्खामा फेवाताल जलकुम्भीले ढाकिन्छ । यो वर्ष असार–साउनमा उतिसारो पानी परेन । भदौमा समेत हर्पन खोला उर्लिने गरी बढेन । भदौ अन्तिमदेखि परेका अविरल वर्षाले भने हर्पन खोला हृवात्तै बढ्यो । भदौ ३१ रातिको ठूलो वर्षाले फेवातालको उपल्लो भेगमा भएको जलकुम्भी हर्पनले बगाएर तल्लो भेगतिर ल्यायो । यतिखेर जलकुम्भीले पुरै ताल ढाकेको छ ।

हल्लनचोक, बाराहीघाट, डिहीकोपाटन, बसुन्धरापार्क, ड्यामसाइड किनारमा जलकुम्भी छपक्कै छ । स्थानीय डुंगा व्यवसायी भुवन परियार यतिधेरै जलकुम्भी पहिलोपल्ट देखेको बताउँछन् । ‘७–८ वर्षदेखि जलकुम्भी बगाएर ल्याउथ्यो,’ उनी भन्छन्, ‘यतिधेरै बगाएर ल्याएको पहिलोपल्ट हो ।’
डुंगा व्यवसायी समिति, सुरक्षाकर्मी, स्थानीय आमा समूह, क्लब, विभिन्न संघसंस्थाले जलकुम्भी झार फाल्दै आएका छन् । गत वर्षदेखि भने मेसिनबाट जलकुम्भी झार फाल्ने गरिएको छ । जलकुम्भी यतिधेरै छ कि सबै सफा गर्न एकदेखि डेढ महिना लाग्छ । पर्यटकीय मौसम सुरु भएको बेलामा फेवाताल जलकुम्भीले ढाकिएपछि पर्यटन व्यवसायी चिन्तित छन् ।

मेसिनले हाल दिनमा १५–१६ ट्रिप जलकुम्भी झार निकाल्छ । एक ट्रिपमा २ टन झार निकाल्ने मेसिन अपरेटर सरोज पुनले बताए । मेसिनले एक घण्टामा ४.५ लिटर डिजेल खपत गर्छ । मेसिन मात्रैले झार फाल्न एक महिनाभन्दा बढी लाग्ने पोखरा महानगरपालिका अन्तर्गत फेवाताल संरक्षण आयोजनाका सुपरभाइजर ध्रुवबहादुर गोदार बताउँछन् । ‘मेसिनले मात्रै चाँडै फाल्न सकिँदैन,’ उनी भन्छन्, ‘पोखराका विभिन्न संघसंस्था मिलेर झार फाल्नुको विकल्प छैन ।’

निर्वाचन क्षेत्र पूर्वाधार विकास कार्यक्रमको ५० लाख र पोखरा महानगरपालिकाको ७५ लाख रुपैयाँ गरी १ करोड २५ लाख रुपैयाँमा मेसिन ल्याइएको हो । क्यानडाबाट ल्याइएको मेसिनको तौल २ टन छ । मेसिनको लम्बाइ ३६ फिट र चौडाइ ८.५ फिट छ ।