सदरमुकाम बेनीकी महिलामा पनि कोरोना संक्रमण

सदरमुकाम बेनीकी एक ५४ बर्षिया महिलामा पनि कोरोना संक्रमण पुष्टी भएको छ ।
बेनी नगरपालिका, ७ बेनी घर भै हालै उपचारक्रममा बेनीबाट पोखरा स्थित फेवासिटी हस्पिटल पुगेकी यी महिलामा कोरोना संक्रमण पुष्टी भएको गण्डकी प्रदेश स्वास्थ्य निर्देशनालयले जनाएको छ । सोही अस्पतालमा उपचार गर्न गएका थप ५ जनामा पनि शनिवार नै कोरोना संक्रमण फेला परेको छ ।
स्वास्थ्य कार्यालय बेनीका प्रमुख एकनारायण लम्सालका अनुसार कोरोना संक्रमण पुष्टी भएकी महिलाको परिवार र कन्ट्याकट्रेसिङमा रहेकाको खोजी भैरहेको छ । हिजो शुक्रवार पनि म्याग्दी देविस्थानकी एक विरामीको पोखराको अस्पतालमै कोरोना पुष्टी भएको थियो । छुट्टै शुक्रवार म्याग्दीमा ७ जनामा कोरोना संक्रमण पुष्टी भएको थियो । शुक्रवार देविस्थानकी महिला र शनिवार सदरमुकाम बेनीकी महिलामा कोरोना संक्रमण पुष्टी भएसँगै समुदायमा कोरोना पुगेको प्रष्ट भएको छ ।