सरिता गिरीको सांसद पद गयो

नेपाल सरकारले कालापानी, लिम्पिया र लिपुलेकको गुमेको नेपाली भूमि समावेश गरी नक्सा प्रकाशन गरेकोमा विरोध गर्दै चर्चामा आएकी समाजवादी पार्टी नेतृ तथा सांसद सरिता गिरीको सांसद पद गुमेको छ ।
उनको पार्टीले नेतृ गिरीलाई निष्कासन गरेको छ । अब उनी सांसद पदमुक्त भएकी छन् ।

सांसद गिरीको अभिव्यक्तिसँगै देशभर विरोध हुन थालेपछि पार्टी महासचिव रामसहायप्रसाद यादवको संयोजकत्वमा एक छानबिन कार्यदल गठन गरी सत्यतथ्य बुझ्ने कार्यादेश दिइएको थियो । सोही कार्यदलले गिरीलाई कारबाही गर्न सिफारिस गरेको हो ।
सोही सिफारिसअनुसार गिरीमाथि कारबाही निर्णय भएको समाजवादी पार्टी स्रोतले जानकारी दिएको छ ।

नेपालले जारी गरेको नक्साअनुसार निशान छाप परिवर्तन गर्न सरकारले ल्याएको संविधान संशोधन विधेयकमा गिरीले संशोधन प्रस्तावसमेत दर्ता गराएकी थिइन् ।

पार्टीले संशोधन फिर्ता लिन र विधेयकको पक्षमा मतदान गर्न निर्देशन दिए पनि उनले अटेर गरेपछि उनीमाथि छानबिन कार्यदल बनाएको थियो ।