मंगलबारमात्रै थपिए ८३ जना कोरोना संक्रमित, राति फेरि थपिए २६ जना, नेपालमा २१७ जनालाई कोरोना पुष्टि

नेपालमा एकै दिन मंगलबार ८३ जनामा कोभिड–१९ संक्रमण पुष्टि भएको छ । मुलुकको संघीय राजधानी सहर उपत्यकाभित्र पनि फेरि संक्रमण देखिएको छ । जसअनुसार काठमाडौंका एक जना महिला १ र भक्तपुरका एक पुरुष र एक महिला गरी २ जनामा कोरोना संक्रमण पुष्टि भएको छ ।
स्वास्थ्य तथा जनस्वास्थ्य मन्त्रालयले मंगलबार राति सवा १० बजे गरेको अपडेट अनुसार पुनः २६ जनामा कोरोना भाइरस पुष्टि भएको छ ।
आजै दिउँसो पनि ५७ जनामा कोरोना भाइरसको संक्रमण पुष्टि भएको थियो । योसहित आजमात्रै ८३ जनामा कोरोना देखिएको छ । हिजो सोमबार पनि २४ जनामा कोरोना देखिएको थियो ।
मंगलबार राति राष्ट्रिय जनस्वास्वास्थ्य प्रयोगशाला काठमाडौंमा गरिएको परीक्षणअनुसार पर्साका १८ जनामा कोरोना देखिएको छ । यस्तै महोत्तरीका २ जना, धनुषाका २ जना, भक्तपुरका २ जना, काठमाडौंका १ जना र सर्लाहीका एकजनामा कोरोना पुष्टि भएको छ ।
उनीहरुमध्ये पुरुष १८ र महिला ८ जना छन् । उनीहरु १६ देखि ६१ वर्षसम्मका भएको जनस्वास्थ्य मन्त्रालयले जनाएको छ ।