बागलुङमा बुधबार ६ जनालाई कोरोना संक्रमण

बागलुङमा ६ जनामा कोरोना संक्रमण पुष्टि भएको छ। गण्डकी प्रदेश सामाजिक विकास मन्त्रालय अन्तर्गत स्वास्थ्य निर्देशनालय पोखराले विज्ञप्तिमार्फत ६ जनामा संक्रमण पुष्टि भएको जनाएको छ।
निर्देशनालयका निर्देशक एवं गण्डकी प्रदेश कोरोना नियन्त्रण तथा रोकथाम कार्यक्रमका संयोजक डाक्टर बिनोदबिन्दू शर्माले तमानखोला गाउँपालिकाका ४ र बढिगाड गाउँपालिकाका २ जनामा कोरोना संक्रमण पुष्‍टि भएको जानकारी दिए।
तमानखोलाका २१ वर्षका दुई र २७ वर्षका दुई गरेर चारजना तथा बढिगाडका १९ र २० वर्षका दुईजनामा संक्रमण देखिएको निर्देशनालयले जनाएको छ।
क्वारेन्टाइनमा रहेका उनीहरूको कोभिड-१९ परीक्षणका लागि स्वाबो नमूना संकलन गरिएको थियो। अहिले ६ जनालाई नै अस्पताल लैजाने तयारी भइरहेको छ। सुनौली नाकाबाट उद्धार गरिएकाहरूमा संक्रमण देखिएको हो। आज पुष्टि भएको नयाँ केससँगै गण्डकी प्रदेशमा कोरोना संक्रमितको संख्या १३ जना पुगेको छ। यसअघि बागलुङकै दुईजना संक्रमित कोरोनामुक्त भएर घर फर्किसकेका छन्। उनीहरु नेपालकै पाँचौ र छैठौ कोरोना संक्रमित थिए ।